Xingyi Lin Chen, Diseinu Grafikoko Graduko ikaslea, Konekta Ideiak ICC + IA azken deialdian aukeratutakoen artean egon da. Deialdi honek teknologia berriak esploratzen dituzten ikus-entzunezko proposamenak bultzatzen ditu. Erakusketa hau Bilboko Udaleko Gazteria Sailaren (@bilbaogazte), La Perrerako lantaldearen eta Miren Lauzirika aholkulari sortzailearen (@miren_lauzirika) laguntzarekin egin da. Gainera, Naiara Lázaro (@nalaga), Guggenheimeko erakusketen diseinatzailea bezalako profesionalengandik ikasteko aukera izan du.
Memoriaren kontzeptua ardatz hartuta, erakusketak “Ni Chi Le Ma?/Jan duzu jada?” du izenburu. Txinatar kulturan eboluzionatu duen eta diasporan bizirik dirauen agurra da; askotan, jan duzun galdetzetik haratago doa, afektu-adierazpen bat bihurtuz. Instalazio hau Euskal Herriko txinatar diasporaren artxibo emozionala da, janariaren, zaintzaren eta afektuen hizkuntza intimoaren bidez eraikia.
Instalazioaren erdigunean, 3Dn inprimatutako plater batek proiekzio-gainazal eta metafora gisa jarduten du. Bertan diasporaren narratiba desberdinak elkartzen dira, eta haiek zeharkatzen dituen olatuak audio-erreaktiboak dira, emozioa irudi eta mugimendu bihurtuz. Soinu-paisaia Mina Qiu ekoizle eta abeslariarekin elkarlanean sortutako konposizio originala da.
Lan osoaren bihotza eta ardatza ahotsak dira. Bideo dokumental batek Euskal Herriko txinatar diasporako pertsonen testigantzak biltzen ditu, bakoitza bere bizipen eta ikuspegiarekin. Haiek dira gainerako elementuei zentzua ematen dietenak.
Ahotsa eman duten pertsonengandik sortzen da hirugarren elementua: objektu pertsonalak. Partekatutako objektu horiek 3Dn modelatu dira, eguneroko piezetatik hasi eta balio sentimentaleko dekorazio-elementuetaraino. Digitalizatuta, dimentsio berri bat hartzen dute, ukigarriaren eta immaterialaren artean, gordetzen denaren eta eraldatzen denaren artean. https://readymag.website/u4237560526/6268448/.
Artista-rekin bisita gidatuak: apirilak 15 eta 17, 19:00etan.
Izena emateko: https://forms.gle/M5EJvCiq8ETxtHC68
Erakusketa irekita apirilaren 18ra arte.
La Perrera, Bilbo